امریکا نے پاسداران انقلاب کے اہم رہنماؤں کی معلومات دینے پر انعام کا اعلان کردیا۔
امریکی محکمہ خارجہ کی فہرست میں پاسدارانِ انقلاب کے کمانڈراحمد وحیدی سرفہرست ہیں، فہرست میں خاتم الانبیاء مرکزی ہیڈکوارٹرز کے سربراہ علی عبداللہی بھی شامل ہیں۔
ایرانی ایرواسپیس فورس ڈرون یونٹ کے کمانڈر سعید آقاجانی، سائبر الیکٹرانک کمانڈ کے سربراہ حمیدرضا لشگریان اور پاسدارانِ انقلاب انٹیلی جنس دفتر کے کمانڈر مجید خادمی بھی فہرست میں شامل ہیں۔ اہم ایرانی رہنماؤں کی معلومات دینے پر ایک کروڑ ڈالر تک انعام ملے گا۔
دوسری جانب امریکا نے ایران سے منسلک کمپنیوں اور شخصیات پر نئی پابندیاں بھی عائد کردیں۔ امریکی وزیرخزانہ اسکاٹ بیسنٹ نے کہا ایران سے منسلک 60 اداروں، افراد اور جہازوں پر پابندیاں عائد کردیں۔ تعلق جوہری، میزائل، سائبر اور تیل کے نیٹ ورکس سے ہے۔
ایران کو بعض ترسیلاتِ زر کی اجازت دینے والے عمومی لائسنس بھی معطل کردیے۔ متحدہ عرب امارات، ہانگ کانگ، چین، سنگاپور، سوئٹزرلینڈ اور یورپ میں بروکر کمپنیاں پابندیوں کی زد میں آئیں۔ روسی خفیہ بحری بیڑے کے جہازوں کے نیٹ ورک پر بھی پابندیاں عائد کی گئیں۔
امریکی وزیرخزانہ نے دوٹوکہ کہا کہ چین سمیت کوئی بھی امریکی پابندیوں کی پہنچ سے باہر نہیں۔ ایران کی حمایت کرنیوالے ہر ملک کو امریکی پابندیوں کیلئے تیار رہنا چاہیے۔ اسکاٹ بیسنٹ کے مطابق ہر ملک کو ایک ڈیڈلائن دی گئی ہے۔ وہ خود کارروائی نہیں کریں گے تو امریکا یکطرفہ طور پر کارروائی کرے گا۔
