بیجنگ میں پاکستانی سفارتخانے کی جانب سے چین پاک سفارتی تعلقات کی75 ویں سالگرہ کی مناسبت سے تصویری نمائش کی مشترکہ میزبانی

چین اور پاکستان کے درمیان سفارتی تعلقات کے قیام کی 75 ویں سالگرہ کی مناسبت سے بیجنگ میں پاکستان کے سفارتخانے نے بیجنگ پیس گارڈن میوزیم اور آئی بی آئی گولیان گوفن کے اشتراک سے، پاکستانی فنکارہ محترمہ نازیہ اکرام کی طرف سے "شیڈوز آف بلوگنگ” کے عنوان سے ایک شاندار تصویری نمائش کی مشترکہ میزبانی کی۔ تقریب میں معززین، فن سے محبت کرنے والوں، میڈیا اور ثقافتی شائقین نے شرکت کی، جس نے نہ صرف پاکستان کی فنکارانہ صلاحیتوں بلکہ دونوں ممالک کے درمیان پائیدار ثقافتی رشتوں کو بھی نمایاں کیا۔ چین میں پاکستان کے سفیر  خلیل ہاشمی نے اپنے خطاب میں کہا کہ گزشتہ ساڑھے سات دہائیوں کے دوران دونوں ممالک نے باہمی اعتماد، احترام اور تعاون پر مبنی تعلقات کا ایک منفرد ماڈل تیار کیا ہے۔ انھوں نے اس بات پر زور دیا کہ پاک چین دوستی وقت کی آزمائشوں پر  پوری اترتی ہے اور مسلسل مضبوط ہوتی جارہی ہے۔انھوں  نے اس بات پر زور دیا کہ پاکستان اور چین کی فنکارانہ خدمات ہمیں یہ بتاتی ہیں کہ مختلف تاریخی حوالوں اور روایات کے باوجود، فن کی زبان ایک عالمگیر تعلق کی بات کرتی ہے جو سب کے درمیان مشترک ہے۔